O thaneskero talalinipe o centrali tschatschipeskero dipeskero organ ando parlamentarischi sistemo le thanestar hi. Uso butja le thaneskere talalinipestar genen pasche o tschatschipeskero dipe (legislativa) te mindenfelitike kontrolakere tschatschiptscha palo angledipe le thaneskere favosinipestar.
O burgenlanditiko thaneskero talalinipe andar 36 dschene kerdo hi, save pal jek glajchi, direkti, naphandlo, tschortschovalo taj ajgeni proporcakero völinipe le thaneskere flogostar upre pantsch berscha völim on taj use lengeri buti ojs rotscha upre nisaj upredipe phandle hi.
O beschipe le thaneskere talalinipestar Tikne Martonate hi. Pal leskero keripe o thaneskero talalinipe maschkar i konferenca use pradime beschiptscha ando thaneskero talalinipeskero baro kher khetan al, andi maschkarutni cajt o komiteji le thaneskere talalinipestar konferenctscha tel likeren.
O rotscha andar lengere riktscha le presidentschen le thaneskere talalinipestar völinen. Le rotschen la glajchi völinipeskera keripeskera partajatar o tschatschipe hi, pe use jek klub khetan te phandel. Sako klub jeke schero völinel.
O presidentscha le thaneskere talalinipestar khetan le scherenca le klubtschendar i presidijalkonferenca keren.
O thaneskero talalinipe andar 36 dschene khetan pe beschel, save pal jek glajchi, direkti, tschortschovalo taj ajgeni proporcakero völinipeskero tschatschipe völim on.
Uso thaneskere talalinipeskere völiniptscha o cile dschuvla taj murscha te völinel troman (aktivi völinipeskero tschatschipe), save upro völinipeskero di o 16to bersch kisetinde, saven upro fristakero di o austritiko schotschakero polgartschengero lil hi, save le völinipestar ar tschapinde nan (krisakero phendo vaj upredipe) taj saven ande jek gemajnde le Burgenlandistar lengero atschipeskero beschipe hi.
Uso burgenlanditiko thaneskero talalinipe völim schaj on (pasivi völinipeskero tschatschipe) o cile dschuvla taj murscha, save te völinel troman taj save upro völinipeskero di o 18to bersch kisetinde.
O nevo völimo thaneskero talalinipe le presidentostar le phure thaneskere talalinipestar ande ofto kurke palo völinipe akardo iste ol. Ada beschipe le neve völime thaneskere talalinipestar pral o phuro presidento taj dschi uso völinipe le neve presidentostar o anglebeschipe vodinel.
Ando erschti beschipe o thaneskere talalinipeskere rotscha pedar o mangipe le presidentostar le phure thaneskere talalinipestar lengero tschatscho patschajipe la republikake Austrija taj le Burgenlandiske, soralo taj tschatscho andlikeripe le tschatschiptschendar taj godschakero andlikeripe lengere normtschendar ascharen. Akor o thaneskero talalinipe le presidento, le dujte taj le triti presidento le thaneskere talalinipestar völinel.
O nevo völimo presidento pal leskero ascharipe o anglebeschipe prik lel taj o völinipe la thaneskera regirungatar (thaneskero schero, dujto thaneskero schero taj o avre thaneskere rotscha) taj te le trin le thanestar Burgenland ar rodime dschenendar taj odolengere fatretertschendar le bundakere rotistar, vodinel.
O akaripe le thaneskere talalinipestar o presidento ande sako kalenderiskero bersch use jek tschatscho talalinipe taj andrutnon o talalinipe use jekoschne beschiptscha kerel.
O tschatschikano talalinipe na te kesdinel anglo 15to septemberi taj na te likerel dureder aun dschi uso 1ti august le arte berschestar. Pedar ari, o presidento le thaneskere talalinipestar te use na tschatsche talaliniptscha schaj akarel, te oda i thaneskeri regirung vaj jek schovto falato le dschenendar le thaneskere talalinipestar magla.
O beschiptscha le thaneskere talalinipestar hatek prade hi. O pradipe ar tschapindo hi, te oda le anglebeschaschistar vaj valami le schovto falatostar le odoj beschte dschenendar le thaneskere talalinipestar manglo ulo taj le thaneskere talalinipestar palo arvodinipe le schunaschtschendar ar kerdo ulo.
Butjakeri imuniteta
O thaneskere talalinipesker rotscha uso keripe lengere mandatostar upre nisaj uprediptscha phandle nan taj len o tschatschipe upre jek ajgeni imuniteta hi. Ada butschol, hot dschene le thaneskere talalinipestar vasch o keripe lengera butjatar schoha na taj vasch o kerde mujutne taj pisime keriptscha tschak le thaneskere talalinipestar uso ferantvoatinipe cidim troman te on.
On vasch jek schtrofinipeskero handlinipe nisaj usephenipeha le thaneskere talalinipestar tschak akor le krisistar vaj birovtschagendar tradim schaj on, te o handlinipe tschatschikan ande nisaj khetanhejnginipe la politischi butjaha le reste rotschendar terdschol, pasche o kris vaj o birovtschago iste o usephenipe le thaneskere talalinipestar akarel. Tschak te valako uso tschatschikano keripe jeke faphageripestar astardo ulo, akor na pekal nisaj usephenipe le thaneskere talalinipestar uso tradipe.
Sako rot iste uso beschiptscha le thaneskere talalinipestar taj le komitejendar, ande savo lo völim ulo, use ol. Use lengero andedschajipe ando thaneskero talalinipe o dschene le thaneskere talalinipestar pedar o mangipe le presidentostar le phure thaneskere talalinipestar lengero tschatscho patschajipe usi republika Austrija taj uso than Burgenland, soralo taj tschatscho andlikeripe le tschatschiptschendar taj godschakero andlikeripe lengere normtschendar iste ascharen.
Anglutne berotiniptscha ando klubiskere beschiptscha taj ando butjakere kariki jek barikano falato la butjatar le rotschendar ar kerel. Taj te afka hi, hot but rotscha meg te jek avra butjake palal dschan. Duach o kontakto le dschenenca, butvar ando jekoschne becirktscha, taj te fori taj gemajntscha le thanestar, o rotscha le mindenfelitike aunpaschlojiptschenca taj gondenca donde pumen bescharen taj odola schaj te andi buti le thaneskere talalinipestar ande anen. Butvar, rotscha te butja ando gemajntscha ande len.
Le jekoschne rotschenge o vakeripeskero tschatschipe ando thaneskero talalinipe taj ando komiteji use al. Ando thaneskero talalinipe taj ande odola komiteji, ande save on völim ule, o hangoskero tschatschipe use lenge terdschol. Maschkar jek beschipe le thaneskere talalinipestar schaj o rotscha andi phutschajipeskeri ora harne phutschajiptscha le dschenendar la thaneskera regirungatar phutschen. Sako jekoschno rot schaj pisime phutschajiptscha jeke regirungakere dschenostar pedar aunpaschlojiptscha mangel, save ando keripeskero than le thaneskere organtschendar peren vaj saven thaneskero politischi barikanipe hi.
Butja le thaneskere talalinipestar
O keripe la tschatschipeskera dipeskera kompetencatar i scheroskeri buti le thaneskere talalinipestar hi. Ov korkore le ardipeske le thaneskere tschatschiptschendar kompetenti hi. Duach o bitschajipe le dschenendar le bundakere rotistar ov te upro tschatschipeskero dipe le bundistar andfojinipe lel. Le thaneskere talalinipe te o tschatschipe upri kompetenca uso mitvirkinipe uso keripe taj usi kontrola le keripestar hi.
Ande adala thana le thaneskere talalinpeske h.a. i tschatschipeskeri dipeskeri kompetenca use al:
- Thaneskero favosinipe, völiniptscha, flogoskere kamiptscha, flogoskere pheniptscha taj flogoskere phutschajiptscha ando thaneskero- taj gemajndejakero than
- Organisacija le thaneskere birovtschagendar
- Gemajndejakero tschatschipe
- Financakero tschatschipe, thaneskere- taj gemajndejakere teldiptscha, favojtinipeskere teldiptscha taj teldiptscha
- thaneskere sicherhajtakere harengere, fajervea, civili arakipe, brigakero pomoschago, ternipeskero arakipe
- Schtiftungtscha taj fonds
- Ischkolakero koja, tschavengere barengere aunpaschlojiptscha, schpurtiskero pomoschago
- Thaneskeri- taj forstakeri virtschoft, naturakero arakipe, marhengero arakipe, jogd taj matschengero andastaripe, flaunslinakero- taj mesujakero arakipe, marhengero likeripe, phuvakeri reforma, basisakero faker, forstiskero tschatschipe, pajeskero tschatschipe
- Kultureli aunpaschlojiptscha, muschikakere- taj khelipeskere ischkoli, mulatintschagoskero koja, kinoskere aunpaschlojiptscha
- Tourismusiskere aunpaschlojiptscha, kurakere koji, elektricitetakere koji
- Thaneskero tschatschipe, bauninipeskero tschatschipe, atschipeskero bauninipeskero pomoschago, poschtitoskero tschatschipe
- Tschavengero- taj ternengero pomoschago, socijali pomoschago, flejginipeskere loj, nasvalengero kherengero koja, retinipeskero koja
Upro keripe, savo la thaneskera regirungatar kerdo ol, o thaneskero talalinipe hatek jek andfojinipe le, kada ov o dschene la thaneskera regirungatar völinel. Jek barikano mitvirkinipe uso keripe o burgenlanditiko thaneskero favosinipe hatek afka kerel, hot o thaneskero angletschalajipe (khereskero plan), i basis la khereskera kontrolejatar le thanestar, duach phenipe le thaneskere talalinipestar ar kerdo ol taj o thaneskero genipeskero kisetinipe le thaneskere talalinipeske angle te paschlarel hi. Taj o thaneskero talalinipe te pedar o scheroskero komitej uso keripe mitvirkinel.
Financijeli kontrola
Le thaneskere talalinipeske ando keripe la khereskera kontrolejatar pasche i genipeskeri vora jek ajgeni kontrolakero organ, i thaneskeri-genipeskeri vora, del.
I thaneskeri-genipeskeri vora jek organ le thaneskere talalinipestar hi taj ojs asavi uso keripe le lake use ale
butjenge, use nisaj anglediptscha organtschendar le schtotlichi favojtinipestar phandli li nan taj tschak le thaneskere talalinipeske ferantvoatinipe ledschel.
Uso butja la thaneskera genipeskera voratar barikano kerinen: i khereskeri kontrola le thanestar; i khereskeri kontrola le la thaneskera regirungake telal terdscharde pradime birovtschage taj institucijontscha, schtiftungtscha taj fonds, save organtschendar le thanestar vaj dschenendar (dschenengere khetaniptschendar) favojtim on, save organtschendar le thanestar akarde hi; i khereskeri kontrola firmtschendar, save o than korkore vodinel vaj use save leske financijeli falati buteder sar 25 procenti use terdschon. Asaj financijeli usekerinipeske o dschanipe le firmtschendar duach avre financijeli vaj avre koji glajchi te likerel hi; i kontrola le latsche andbescharipestar taj le virkinipestar le lojendar, save le thanestar dija, pasche mek o prik lime ferantvoatiniptscha le thaneske le ferantvoatiniptschendar; o mitvirkinipe uso phendo le financijeli arvirkiniptschendar le tschatschipeskere keriptschendar le thanestar upro mangipe le thaneskere talalinipestar vaj jeke leskere komitejendar; o mitvirkinipe usi khetanipeskeri tschatschipeskeri financakeri kontrola.
O thaneskero talalinipe la thaneskera regirung kontrolirinel, a.b. hot ov o botakera vodinipe la thaneskera regirungatar aun peske schaj dikel taj odoleskere dschene pedar o cile koji le keripestar schaj phutschel taj o cile use kerinipeskere aundiptscha schaj mangel. Pedar ari o thaneskero talalinipe la thaneskera regirung vaj jekoschne dschene telal barikane micinipeskere koji tel schaj bescharel (Telbescharipeskero völinipe).
o interpelacijonakero tschatschipe = tschatschipe, le dschenendar la thaneskera regirungatar pisime phutschajiptscha taj te ando beschiptscha harne mujutne phutschajiptscha te terdscharel
o resolucijonakero tschatschipe = tschatschipe, leskere kivaniptschenge pedar i buti le keripestar ande resolucijontscha ardschumintschago te del
o citatjionakero tschatschipe = tschatschipe upro kherodipe le dschenendar la thaneskera regirungatar uso berotiniptscha le thaneskere talalinipestar taj te leskere komitejendar
o schajipe le andebescharipestar kontrolakere komitejendar usi kontrola tschatschikane aunpaschlojiptschendar le thaneskere favojtinipestar
Barikane koji la tschatschipeskera kontrolatar hi o tschatschipe valami le triti falatostar le rotschendar, usi favosinipeskeri krisakeri vora jek aunpaschlojipe upro putripe jeke thaneskere tschatschipestar vasch na favosinipeskero tschatschipe te terdscharel taj o schajipe le panasi tschijipeske gejng o dschene la thaneskera regirungatar usi favosinipeskeri krisakeri vora vasch vitesijeskero tschatschipeskero dukajipe duach lengeri birovtschagoskeri buti taj vasch schtrofinipeskere krisakere handliniptscha, save tradim iste on.