Palo artikl 2 bundakero-favosinipeskero tschatschipe i Austrija jek bundakero schtot hi, savo andar o bund taj o enja bundakere thana kerdo hi. O bundakero schtotlichi karakteri la Austrijatar ari al andar o keripe jeke and granicalime autonomi thaneskere tschatschipeskere dipestar. O upre ulajipe le schtotlichi butjendar maschkar o bund taj thana o mogoskero falato la bundakera schtotlichi strukturatar kerel. Ada kompetencakero ulajipe le bundakere-favosinipeskere tschatschipestar o schtotschakere butja palo mindenfelitike schtotschakere funkcijontscha (tschatschipeskero dipe, favojtinipe taj justica) upre ulal.
Ando than le tschatschipeskere dipestar o bundakero favosinipe o butja upre genel, save le bundiske use peren, taj o na akarde aunpaschlojiptscha duach jek generaliskeri klauslina le thanenge use an.
Andrutno le thaneskere tschatschipeskere dipestar maschkar o thaneskero favosinipeskero tschatschipe taj o loke thaneskere tschatschiptscha te völinel hi. O bundakero favosinipe angle dikel, hot o favosinipeskero tschatschipe le thanendar ande thaneskere favosiniptscha kerdo ol. O thaneskero favosinipe hatek oda tschatschipeskero than hi, savo o koji le thanendar iste kerel. Adaj hatek vasch odola normtscha dschal, save o keripe le thaneskere tschatschipestar ar kerel. Pasche ada thaneskero favosinipe, o thana te jekoschne thaneskere favosinipeskere tschatschiptscha taj favosinipeskere pheniptscha ande loke tschatschiptscha ar schaj den. O thaneskero favosinipe le bundakere favosinipe "na tromal aun te astarel". O bundakero favosinipe hatek o koja la and granicalima favosinipeskera autonomijake le thanendar kerel. O thaneskero favosinipeskero tschatschipe hatek afka ando schtufnengero bauninipe le tschatschipestar telal o bundakero favosinipeskero tschatschipe terdschol.
Vusko le basisakere barikanipeha le thaneskere favosinipeskere tschatschipestar leskeri utscheder terdschojipeskeri sor khetan phandli hi. Oj akor esbe te lel hi, te lakero keripe vaj irinipe tschak telal phare koji (duj tritliskero scheroskero falato ando thaneskero talalinipe) kerdo schaj ol. O nominirinipe le avre thaneskere tschatschipestar ando loke thaneskere tschatschiptscha kerdo ol.
Hatek schtar schajiptscha del, sar tschatschipeskere lila le thaneskere talalinipeske use ledschim schaj on:
- Regirungakero anglepaschlojipe – la thaneskera regirungatar
- Inicijativakero lil – valami duj rotschendar
- Komitejiskero lil – jeke komitejistar
- Flogoskere kamiptscha
Afka thaneskero tschatschipe kerdo ol - grafischi sikajipe - (pdf, 11,7 MB)
I debata ando erschti genipe upro vakeripe le basisakere kojendar le anglepaschlojipestar vaj le lilestar iste pe likerel. Uso berotinipe le uso thaneskero talalinipe use ledschime tschatschipeskere keriptschendar deschujek komiteji kerde ule.
Ando deschujek komiteji le thaneskere talalinipestar o ande ledschime tschatschipeskere lila angloda berotim on. Komiteji, te jek tschatschipe igen barikano berotim iste ol, telutne komiteji schaj keren. O beschiptscha le komitejendar vaj le telutne komitejendar nan prade. O rotscha ham use lengere berotiniptscha ekspertscha vaj ekspertkiji use schaj len.
Palo berotiniptscha ando komiteji vaj ando telutne komiteji o pradimo berotinipe ando dujto genipe le thaneskere talalinipestar al. O dujto genipe hi andar i debata pedar o anglepaschlojipe le cilostar (generaliskeri debata) taj o berotiniptscha pedar jekoschne falati le anglepaschlojipestar (schpecijali debata) taj te andar o telschtiminiptscha.
Paloda o anglepaschlojipe ando dujto genipe ar kerdo hi, o triti genipe, ada o telschtiminipe ando cilo hi, kerdo ol. Use jek phenipe le thaneskere talalinipestar valami jek triti falato le thaneskere talalinipeskere rotschendar use iste on taj o loko scheroskero falato le tel dime hangijendar pekamlo hi.
Thaneskere favosinipeskere tschatschiptscha taj ande loke thaneskere tschatschiptscha and cidime favosinipeskere pheniptscha tschak akor kerde schaj on, te valami o epasch le thaneskere talalinipeskere rotschendar taj jeke scheroskere falatostar le valami duj triti falatendar le tel dime hangijendar dim hi.
O thaneskero schero o cile tschatschipeskere phende le bundakere kancleriskere birovtschagoske prik del.
I bundakeri regirung gejng tschatschipeskere keriptscha le thaneskere talalinipestar ande ofto kurke fundirti andphenipe schaj asdel. Ando peripe jeke andphenipestar o tschatschipeskero keripe tschak ar dim schaj ol, te o thaneskero talalinipe duach jek terdschojipeskero phendo use leskero arkeripe atschol.
O cile tschatschipeskere pheniptscha le thaneskere talalinipestar le thaneskere presidentostar tel pisim iste on. Oda telpisinipe duach jek anaveskero telal pisinipe telal o ar kerdo tschatschipe kerdo ol. Palo telpisinipe duach o thaneskero presidento, o cile tschatschipeskere pheniptscha le thaneskere scheroske uso telal pisinipe angle paschlarde on.
Palo telnaschipe la andphenipeskera cajtatar, palo usephenipe la bundakera regirungatar vaj palo ardschumintschago jeke terdschojipeskere phendostar, o tschatschipeskere arkeriptscha andi thaneskeri tschatschipeskeri patrin le thaneskere scherostar iste ar dim on. Te ando tschatschipe nischta avro ar kerdo hi, le telnaschipeha le ardipeskere dijeha, genel.
O thaneskero tschatschipe Burgenland ando tschatschipeskero informacijakero sistemo le bundakere kancleriskere birovtschagostar aun diklo schaj ol. (www.ris.bka.gv.at/lr-burgenland)